News 2014/2015

Haubfinau in Burgdorf... Pingu vs. Bucanero

Immer wieder Sunnti… vorn e wäg, Pinguine heissech mit 8:4 chönne düre setzte, was eigentlech nid viu mitem Spiuverlouf ztüe het.
Es isch so gsi, dass Pinguine bereits im erschte Isatz es Gou hei chönne erziele und Bucaneros ständig hei müesse ufhole. D’Gou hei ufzeigt, dass Pinguine eigentlech die spiubestimmendi Mannschaft würd markiere. Ufem Is säuber hets aber trotzdem nid so usgseh. Bucanero hetsech immer wieder im Drittu vo de Pinguine chönne feschtsetzte u Schüss ufs Gou mache. Dasmau ischs aber so gsi, das dr Goalie (im Gägesatz zu angerne Spiu) e Sunnti gha het u mit gekonnte Paradene Bucaneros zum Verzwiefle het bracht (guet, er het schliesslech ou e ganzi Saison Ziit gha, sim Kolleg Simon Rytz abzluege, wies geit)…
Die erschti Linie vo de Pinguine hei angersits ihri Abschlüss oftmaus glücklech im Netz vom Gägner chönne deponiere.
Hätte Bucaneros e chlii meh Abschlussglück gha, wär i dem Spiu sicher Spannig u vermuetlech ou diversi Ghässigkeite uf cho.
Erwähnenswert die beide Szene, wo dr Verteidiger Arn mittus „Tschechetrick“ dr gägnerisch Goalie het la verschiebe, dr Pass zrügg ufe Stalder gspiut het, wele dr Pögg nur no het müesse ine due. Üse Schwingersniper Florian G. us A. hetsech dä Spizug gmerkt u hetne quasi identisch gmacht u het dr Simu A. us L. mitemne Backhändpass lanciert, worus äbeso es Gou erziuut isch worde.
Schlussentlech hetme in Anbetracht vo de klare Verhäutniss nang nüm wöue weh due u hetsech gägesitig mitemne Lächle uf dr Lippe verabschiedet.
Nachem Spiu si no Topscorer vo üsere Gruppe geehrt worde. Drbii hetsech üse Tunnuflitzer „Rüschtü“ (übrigens dr erscht türkisch Staatsaghörig uf Schwiizer Is) die Trophäe mit sine 44 Scorerpünkt, dütlech für sich chönne beanspruche.
Mit dem Sieg heisech Pinguine füre Finau qualifiziert!
Dr Finau gäge SCB Fan Club, findet em 29. März em Abe em haubi Nüni in Burgdorf statt.

Klare Sieg im letschte Qualispiu

Sletschte „Qualispiu“ vo de Pinguine isch bi strahlendem Sunneschiin unmittubar näbe dr Feuswand, weli z'Bernbiet vom Wallis trennt, obe im Kandertau gsi, wo Pelzner miter wou lengsemste Ismaschine vor Welt Pinguine begrüesst hei.
Wie im Hispiu zeigtsech, dass Pelzner stets ei Schritt zspät und individuell echlii schwächer gsi si. Somit hei Pinguine gnue Platz gha, um das Spiu so chönne zgstaute wie Si hei wöue und si nie würcklech i Bedrängnis cho.
Fouge desse hei Pinguine mitemne ungfährdete 2:11 Sieg 3 Pünkt is Seeland chönne bringe und zum Abschluss dr 2. Rang ir Gruppe B gsicheret.
So spile Pinguine em kommende Sunnti Morge 9:00 z'Burgdorf dr Haubfinau gäge Bucaneros. Dr zwöit Haubfinau vor Gruppe B isch zwüschem SCB Fan Club und SC Bärner Bär.

Rövasch isch glückt!

Pünktlech zum Monetsafang sisech die zwöi Mannschafte nach zwöiwüchigem Ungerbruch erneut gägenüber gstange. Het Albatros z'Hiispiu doch chli überraschend gwunne, aber keineswegs unverdient, hei Pinguine im Rückspiu nüt wöue la abrönne la.
Es isch wieder beidsitigs kämpferisch und unermüedlech los gange sich gägesitig zbelagere. Im erste Drittu het dr Schiri sofort sini Linie ufzeigt, was beidsitigs es paar chlini Strafe gä het, aber em Spiu ou die nötigi Rueh.
Pinguine hei das Spiu grundsätzlech ir Hang gha und s'erste Drittu verdient mit 3:1 gfüehrt. Albatros si nid viu, viuversprechendi Abschlüss glunge. Jedoch heisi gwüsst wiesi z'Heimteam mit chernige Vorcheckings dermasse hei chönne unger Druck setzte, dass ihne de doch zeinte oder angere Gou nid unverdient glunge isch.
Zwüscheziitlech het Albatros uf 5:3 chönne verchürze. I dere spiuentscheidende Phase heisech Pinguine – entgegä vom Spiuverlouf und dür fiumriifi Gou – ä beruhigende Vorsprung chönne use spile.
Es muess erwähnt werde, dass Albatros nie ufgäh het. E chlii meh Wettkampfglück im richtige Moment hätt vermuetlech glängt um Pinguine, wie im erste Spiu, is Schwanke oder gar is Kippe zbringe.
Schliesslech hei Pinguine mit emne chlii höch usgfauene, aber nid unverdiente Siig, diä drei Pünkt gsicheret.

Mit mini Kader zum maxi Sieg

Samsti Abe, Playoffbeginn ir NLA.........das hetsech ou ufem Isch bemerkbar gmacht, Bätterkinde Flames (10 Spiler) wie ou Pinguine (9 Spiler), heissech z'Burgdorf zumne Fründschaftsspiu troffe.
Beidi Mannschafte si trotz chlinem Kader bereit gsi umnes guets Spiu ab zliefere.
Dr Start isch nid grad intesiv gsi, hei wou d'Kräft chli wöue iteile. Pinguine heis Skore eröffnet und füehrte no vor dr Pouse sicher mit 3:7.
Kurz nach dr Pouse hetsech dr Goalie vo de Flames verletzt müesse la uswechsle. Vo dere Steu wünsche mir ihre gueti Besserig! Z'muntere Gou schiesse isch aber ou ir zwöite Häufti witer gange, so dass ds Schlussresuutat mit 8:13 doch klar zu Gunste vo de Pinguine gsi isch.

Schneeschlacht gwunnä

Samsti 21.2.15 bereits am Morge setzt starche Schneefau i. Dräht si heiss glüffe, doch es isch entschiede worde, dass das Spiu uf dr offne Isbahn z'Schwarzwasserbrügg gspiut wird.
Im erschte Drittu het me nid würcklech vomne Ishockeyspiu chönne rede, denn dr Schnee het es entsprechends Spiu verhinderet. D'Pinguine heisech aber öpis besser zrecht gfunge u si mitere 1:3 Füehrig i die ersti Pouse gange.
Im zwöite Drittu isch dr Schneefau chli weniger worde u so isch es Spiu scho eher müglech gsi. D'Pinguine hei auerdings chli dr Fade verlore, obwou me meh Spiuateil het gha u so heisisech mit eim Gou Vorsprung i die zwöiti Pouse chönne rette.
Im letschte Drittu heisi die spilerische Vorteile i Gou chönne verwerte u hei das Spiu mit 5:7 chönne gwinne.

Pinguine schlö sech säuber

Z'Bärner Cup Spiu gäge Albatross isch für Pinguine e Lehrstung gsi a Effizienz.
Eigentlech hei d'Pinguine meh vom Spiu gha u heissech ou meh Chance usegspiut aus dr Gägner.
Für einisch sisi nid i Rückstang cho, doch Si heis ou nid gschafft drvo z'zieh.
Albatross hei de Pinguine i de erste zwöi Drittu zeigt, was Effiziens bedütet. Mit gfüute sech Agriffe heissi füf Gou gmacht!
U plötzlech sisech Pinguine no säuber im Weg gstange. So isches cho, wies het müesse cho....... Albatross heissech a de Pinguine verbii kämpft u ihne die zwöiti Niederlag im Bärner Cup gmacht.

2 mau Wiehnachte...

......denn d'Pinguine, wie ou The Göttis heissech etlechi Gschänk gmacht!
Das Spiu cha definitiv nid aus defensivs hochklassigs Spiu i Gschicht i ga.
D'Pinguine hei em Afang me Spiuateile gha, doch z'Resultat hets nid la erahne.
The Göttis hei schnäu u schnörckulos konteret, so das Sie meistens 2 Gou im Vorprung si gsi.
Zur Spiumitti isch de 5:8 für The Göttis gsi.
Ir zwöite Heufti hei d'Pinguine chli Bode chönne guet mache, heissech aber immerno zviu la uskontere la. Paar Minute vor Schluss isch de Pinguine doch no dr 12:12 Usglich glunge u so hettme das Fründschaftsspiu mitere Punkteteilig beändet.

Tag vo de offne Gou

3:0, 5:5 und 3:2........das chönnte aues ou Spiuresultat si, doch es si Drittusresultat!
Es isch dr Tag gsi vo de offnige Gou! D'Pinguine si guet i Partie gstartet u hei im erste Drittu aues im Griff gha u es hätt ir erste Pouse scho 5:0 chönne si. Mi het z'Spiu agfüehrt, dr Gägner het nid unbedingt vieli Chance gah u was de glich no ufs Gou isch cho het üse Goalie mit paarne super Paradene gha!
Doch plötzlech isch dr Fade i üsem Spiu grisse. Diä individuelle Fähler het dr Gägner iischaut usgnützt u isch so im zwöite Drittu vom ussichtslose 8:2 zum 8:5 cho.
D'Pinguine hei irgendwie wiedr is Spiu müesse zrugg cho. Dr Hattrick vom Ruchti Ändu isch im letschte Drittu nötig gsi, um diä ufsässige Fählibrätscher doch no mit 11:7 chönne zbezwing.

Grosse Ufwand, chliine Ertrag

Nach dere 4:12 Pleite gäge SCB Fan Club heissech d'Pinguine nüm so weue la abschlachte la.
Was Si sech vorgno hei, hettme zwar spielerisch chönne umsetzte, doch Gou hei nur d'Mutze gmacht.
Das isch einersits em eigene Unvermöge gläge, so wie em glänzend hautende Bärner Goalie. So hei d'Berner üs vier mau uskonderet u si nach 20 Minute 4:0 in Füehrig gläge. Das isch nid gad nach üsem "Gameplan" gange, doch mir hei ou gwüsst, dasmer eifach so müesse witerspile. Gseit u gmacht u lug da, s'zwöite Drittu het de Pinguine ghört wo dr 4:0 Rückstang zumne 4:5 Vorsprung hei chönne dräie. Im letschte Drittu hetme d'Füehrig sogar no ufenes 4:6 usbout. Leider heimers ou i däm Spiu nid gschafft, dä Vorsprung über Ziit z'bringe. D'Bärner hei wiedr mit zwe Konter (eine sogar i Ungerzauh!) dr Match uf 6:6 chönne usgliche. Nichts desto trotz isches es intensivs u guets Spiu gsi!

Schwachs Spiu

Wie me im letschte Spiu gmerkt het, si Spiuziite em früeche Morge nüt für üs.
Nach dem Spiu muess me fasch säge, das ou Spiu nach de achte em Abe ou nüt für üs si ;)
Imne Spiu mit viune Fähler u weni zämmehängende Aktione hei Bärner Bäre z'glücklechere Endi gha as Pinguine. Z'Spiu isch bis zum Schluss spannend blibe, denn kere Mannschaft ischs glunge sech würck ab z'setze. Wo Pinguine 10 Minute vor Schluss 3:4 i Füüehrig si gläge , heisi wou scho z'fescht a Sieg dänkt. Doch d'Bären hei nid ufgä u ei Minute vor Schluss no dr 5:4 Siegesträffer erziehut.
Hoffemer as Pinguine em Sunnti uf d'Siegesstrass zrugg chere!

Ersti und Höchi Niederlag zum Jahresbeginn

4:12 hets Endresultat gäge Leader vor Gruppe B vom Bärner Cup gheisse.
Dür das as Pinguine i däm Spiu d'Strafbank uf ihrer Site es paar mau zviu Bsuecht hei, het dr SCB Fan Club gnue müglechkeite gha zum das usznütze. So hei d'Pinguine ihri ersti Niederlag im Bärner Cup becho. Hoffemer mau as das de Pinguine e Lehr gsi isch u si sech wiedr meh uf Hockey konzentriere as ufs Reklamiere!

NO GO!!!

D’Vorbereitig isch aues angere aus Rüemenswert gsi vo de Pinguine. D’Festschnousereie u dr verlornig Finau gäge d Ischbäre em Stephanstag Turnier isch sicher aues angere as optimau gsi, um gäge diä wiä gwohnt starche Bärner Bäre chönne zgwinne.
Nuso denn, d‘Bärner si ohni Rücksicht uf Verluschte is Spiu gstiege u hei diä doch überraschte Pinguine teilwies zimli a d’Wang drückt. Trotz starchem Gägewind si d’Pinguine 1:0 i Füehrig gange u hei ir erste Pouse mit 2:1 gfüehrt.
D’Gägner hei mit Gschwindigkeit u motiviertem, teilwies ou übermotiviertem Isatzwiiue das Spiu doch no chönne dräie u de isches churz nach dr Heufti vor Spiuzyt, aber nid unverdient,  2:4 zugunschte vom Gägner gstange. Churz vorem Abschluss vom Mittutrittu isch de Pinguine i überzau dr Ahschlusstreffer glunge, wonach mitem Spiuverlouf entsprechende 3:4 z’letschte Drittu het chönne i Agriff gno werde.
Näbebii zerwähne, d’Bärner si nach wie vor wie d’Füürwehr agstürmt u hei mit Ihrer physische Spiuwies dr Gastgäber, wie ou dr einzig Schiedsrichter chönne überrasche u ou provoziere!
Im letschte Drittu si knapp 5 Minute gspiut, doch ahgfüeut hettsechs wiene haub Stung! D’Startphase isch prägt gsi vo Scharmützle, Hinterhäutigkeite, Diskussione, Schlegereie u drus entstandeni Strafe.
Dr Schiri isch nid zbeniede gsi u ou d’Häufer im Hüsli hei auii Häng vou z’düe gha.
Beidsitigs si Strafe gforderet, provoziert u ou usgproche worde.
Dr Spiurüthmus isch is Wanke cho, was d’Pinguine teilwies hei chönne usnütze.
Hätte Bärner Bäre ihre Spiuverlouf konsequent umgsetzt, wär z’Resultat mit Sicherheit angers ume gsi, doch so hei d’Pinguine nach Ablouf vor Zyt das Spiu 8:5 für sich entschiede!

Am Rand: Es geit gar nid, das deu Spiler wo uf dr Strafbank hocke, sech so verbau gäge die freiwiuige Häufer üssere. Das isch eifach es NO GO!!! „Konzentriert öich uf öiie Job u nid uf dä vo de angere!“
Irrtum vorbehaute heisech gegnerischi Spiler uf dr Strafbank gägenüber dr Zytnähmerin verbau dermasse drnäbe verhaute, dass sie us erwachseni Person no vom eigete Vater eini hinger d’Ohre hätte becho!

Guet's 1. Drittu het glängt

Ds 3. Spiu im Bärner Cup isch ufem Plan gstange, dr Gägner isch z'Team Pelzner gsi. Vom letschte Jahr her hetme gwüsst, das Pelzner es ufopferigvous Team isch.
Mi het ou i dem Spiu vo Afang ah gmerkt, das Si ou hüt um jede Pögg werde kämpfe. D'Pinguine si aber guet gstartet u si mit 1:0 i Füehrig gange, doch churz drufabe hei Pelzner ume usgliche. Doch ner sis nur no Pinguine gsi wo bis zur erste Pouse Gou hei gmacht u si mit 5:1 drvo zoge.
Nach dr Pouse hetme Gou verwautet u het jewiels ufenes Gou vo de Pelzner mitemne witere Gou reagiert. So ischs zur 2. Pouse 7:4 gsi u zum Schluss hei d'Pinguine 8:5 gwunne.
 

Gouräge ir Seelandhaue

Was isch das fürnes Spiu gsi! Gou um Gou hets gä!!
10:10 nach 60 Minute zwüsche Albatros us Lyss und em HCSP. Eigentläch hät das Spiu us Bärner Cup Partie ustreit söue werde. Da d'Albatrosse keni 10 Spieler hei chönne ufbiete hei d'Pinguine mit Spiler usghuufe und so isch das Spiu nid as Bärner Cup gwertet worde. Wie bereits gseit, isch das Spiu mit offenem Visier gfüehrt worde. Es isch es hin und her gsi ir Torfoug. D'Pinguine heis trotz Fäudüberlägeheit nid gschafft, sich abzsetze und so isch das Spiu immer spannend blibe. Im letschte Drittu ischs de Pinguine de doch no glunge ä 4-Gou Vorsprung use zspile, doch d'Albatrosse hei nid ufgä und hei die Partie kurz vor Schluss no usgliche. E Dank geit ai Hänzi u Stalder, wo kurzfristig igsprunge si und mir so doch no öpis für üsi aute Knoche hei chönne mache ;)
Es Ersatzdatum wird für Januar/Februar 2015 gsuecht.

Uf u Ab

Am Samsti Nami si d'Pinguine vo dä Old Boys Langethau gforderet worde.
Ds Spiu in Burgdorf het sech zumne uf und ab entwicklet mitem bessere Endi für d'Pinguine.
D'Huusherre us Langethau si aber keineswegs diä schlechteri Mannschaft gsi.
Ir Afangsphase hei d'Pinguine grossi Müeh gha die ufopferigsvoue kämpfende Old Boys z'kontrolliere.
So isches nume logisch gsi, dass d'Old Boys z'Skore eröffnet hei und plötzlech mit 3:1 in Front gläge si.
D'Pinguine hei aber drgäge gha und hei sogar dr Füehrigstreffer zum 3:4 gschafft. Aber no vor dr Pouse sis d'Old Boys gsi, diä sech d'Füehrig wieder zrügg erkämpft hei.
Nach dr Pouse gliche d'Pinguine ernöit us. E Doppuschlag vo de Old Boys schiin scho fasch d'Entscheidig zgsi si. Doch es isch ganz angers cho, innert kürzeschter Frist hei d'Pinguine 3 Gou gschosse und füehrte so wieder z'Skore a. Nachem 3er Pack isch d'Luft dusse gsi bi de Old Boys. D'Pinguine hei ner konsequänt witer gspiut und erziute ir Foug no witeri 3 Gou.
Spieler vom Nami isch dr Ändu Ruchti gsi mit 5 Gou und eim Assist wele so sini Liiderposition ir Skorerlischte zementiert het.

No kes Spiu verlore

Mä chönnt fasch meine, es gäbi keni Gegner für d'Pingine ;)
Ds Hin- und Rückspiu gege d'Bucaneros im Berner Cup heisi beidi chönne gwinne.
D'Pinguine hei im erste Berner Cup Spiu e starchi Leistig zeigt u hei de Bucaneros zu kere Zyt ou nur e Huuch vore Chance gla. Ds Spiu endet klar mit 3:9 zu Gunste vo de Pinguine, die dür ihri pfiuschnäue und starche Stürmer Bucanero fasch am Laufmeter uskonteret hei. Ei Spieler vo de Pinguine het leider es unfairs, unsportlechs und nid es akzeptierends Verhaute zeigt und isch für 2 Berner Cup Spiu gsperrt worde!

Wie bereits bim Hispiu im Brünnli isch de Bucaneros dr früeh Füehrigstreffer glunge. Auerdings hets nid lang duret bis d'Pinguine usgliche hei une churz nachem Usglichstreffer ou dr erst und zwöit Füehrigstreffer glunge isch. Jtz isch d'Unsicherheit bi de Bucaneros starch spürbar worde. Seedorf diktiert das Spiugschehe, weles fasch usschliesslech im Drittu vo Bucanero statt gfunge het. Ds Rückspiu hei d'Pinguine mit 9:4 gwunne.
Wasme bi dem Spiu gmerkt het, isch wenn e Frou das Spiu kontrolliert, sogar d'Manne sehr liebevou dr Pögg chöi ufnäh ;)

Letschte Samsti hei d'Pinguine es Fründschaftsspiu gäge d'Indios Senioren gha und hei das Spiu klar mit 11:5 chönne gwinne.

Es Spiu ohni grossi Höhepünkt

1.11.2014 Samsti Nachmittag, d'Pinguine hei d'Flames us Bätterkinden zumene Fründschaftsspiu bätet.
I dr Vergangeheit si die Spiu gege d'Flames meist hart umkämpft gsi. Das mau jedoch hei d'Flames e sehr schlechte Tag gha.
D'Pinguine dominierte d'Gegner nach beliebe und hei sich schnäu mau i Front gschosse. Dr Pousestand seit scho vieles über z'Kräfteverhäutnis us....
9:1 heisst das klare Verdickt zur Pouse. Nach dr komfortable Führig heis d'Pinguine e chli ruhiger la aga la u si ou ir Chanceuswertig nüm meh so effizient wie vorher gsi.
Am Schluss hets es klars 16:1 z'bejuble gha. Skorer vom Tag isch üses "Gerburtstagsking" Flöru "the Sniper" Gnägi mit 6 Punkt gsi (4 Toren / 2 Assist).

Es Spiu mit Liecht u Schatte

Ds gfühute 1'000. mau heisech d'Pinguins us Team Cannabis troffe.
D'Begägnig isch wie immer vo viu Isatz und Emotione prägt gsi, abr immer im faire Rahmen blibe, bis uf ei einzelni Aktion kurz vor Schluss.
Aber vo Afang ah: d'Pinguins si guet is Spieu gstartet. Mä hetsech immer wieder i gueti Abschlusspositione chönne bringe, was aber vorerst nid i Goal umgsetzt isch worde. Nach ämne kapitale Fähler vom "uHu Burki", ischs Team Cannabis mit 0:1 i Füherig gange.
D'Pinguins zeigte aber Morau und gliche z'Skore wieder us. Ä erneute Rückstang no vor dr Pouse het wieder chönne usgliche werde.
D'Pinguins hei meh vom Spiu u hei mehreri Grosschance vergäh, doch mä het nid ufgäh u het das Spiu zum Schluss mit 5:2 für sich chönne entscheide. Gägs Endi vom Spiu ischs no zure unschöne Szene cho diä im Plauschhockey nüt zsueche het. Ä Pinguin hettsech nüm unger Kontroue gha u checkt e Gegner nechi vor Bande i Rügge, woruf dä Kopf's vora i d'Bande gstürzt isch. Settigi Aktione verachte mir u wünsche a dere Steu em Schumi gueti Besserig u hoffe dass er sich nid z'grob verletzt het!

D'Pinguine u ihri Goalies - Fluech oder Säge?

Sit dr Stammgoalie Jvi Schüpbach i dr vergangene Saison ufgrund vore erneute Schuutereverletzig sini Hockey-Karriere abrupt het müesse beände, stöh uf dr Telefonliste vom "El Chefe" gfüuti 10 Telefonnummere vo Goalies, damit wenigstens sichergsteut cha werde, as pro Spiu ei Maa zwüsche de Pföschte steit.
Für's Spiu gäge d'Seniore vom Bucheggberg wär dr Silvan Andrey vorgseh gsi. Wies im Plouschhockey haut so geit, isch e Mannschaftsliste nid mau denn definitiv, wenn z'Spiu scho agfange het. So ou am letschte Weekend. Da dr Andrey aber em Vorabe no het müesse absäge, het dr Hofmä sis Natel gno u zouberet churzerhand üse ehemalig Goalie us dr erste Mannschaft, Fabian "Aschi" Ernst usem Ermu. Kei Stammgoalie, Stress, Ungwüssheit.. eidütig e Fluech!
Zum Spiu: Dr Gägner isch gstartet wie d'Füürwehr u hät bereits nach wenige MInute locker mit drü Goals chönne fürere.. e Ersatzgoalie mit 2. - Ligaerfahrige - e Säge! D'Pinguins erwachte aber ou no usem Tiefschlaf u chöi - Teils mit Glück - Goal um Goal erziele, sodass me mitere beruhigende 5:0 Füehrig id Pouse het chönne ga. Nachem obligatorische Zielwasser i dr Pouse isch die zwöiti Häufti munter witergange mit Goal schiesse, wobii dr gägnerisch Goalie nid usnahmslos vom Glück gsegnet isch gsi. Zum Schluss hei Pinguins z'Spiu sicher mit 11:5 gwunne.
Zum Schlussresultat cha u muess gseit werde, as das nid sehr ussagechräftig isch: Dr Gägner isch sicherlech nid schlechter gsi as d'Pinguins, abr dr "Aschi" dr Hexer het mit sire Routine d'Bucheggberger bi ihrne zauriche u viuversprächende Agriffe u Abschlüss schier zum verzwiefle bracht!
Insgesamt ischs es fairs Spiu gsi, was sicherlech ou em Verhaute vom Gägner u de Schiedsrichterleistig guetzschribe isch.
Fraglech, wie z'Schlussresultat bi umgekehrter Goalie Ufstellig usgseh hät... Stand jetz: Pinguins u ihri Goalies: E Säge!

Los geit's!

Läck, si die Pingle ume e Macht! Dank em Chris-The-Wall chame sich fantastisch uf d'Offensive konzentriere u drzue chame sich ou es ungrads mau ei oder haut o 10 Strafe mit zum Teil doppleter Ungerzau erloube! Em Schluss gwinne d'Pinguins 5:2 gäge d'Seeland Ice Hogs u starte somit guet i die nöii Saison!
Aui witere Fründschafts- u Bärner Cup Spiel si ab sofort online.

Pingutag 2014

Am 23.08.14 hei Pinguine bi mässigem, aber einigermasse hautendem Wetter, ufem Festgländ vor Irène und em Hümmu uf em Grissenberg, dr 2. Pingu-Familientag düregfühert. Mir chöi ufne üsserscht glungnige Alass zrüggblicke, bi dem nid weniger aus 56 Persone z'verzeichne si – so macht's Freud! Es geit es grosses Dankeschön ad Irène und Hümmu, weli Ihres Gländ, sowie die ganze Spielgrät kostefrei zur Verfüegig gsteut hei. Es bsunders „Merci“ geit a au die Naturauspende i Form vo Salät, Züpfene, Dessärts und Zieuwasser. Nid z'vergesse si die finanzieue Zuestüpf vo de Teilnähmer wie ou vom Verein – fantastisch – ohni öiies Engagement und die Wärtschetzig wär sone Alass vermuetlech e Flop oder gar nid realisierbar! Nathürlech geit ou es grosses MERCI a Hümmu u Authuus wo dä Alass überhoupt ersch uf Bei gsteut hei u aues drum herum organisiert hei!
Nach erfougter Abrechnig chöi d'Organisatore feststeue, dass e Überschuss fürig isch. Dä wird i d'Pingubierkasse ifliesse oder dr Garderobeimbiss im kommende Trainingslager finanzieren.
Schön siter aui drbii gsi und mi gsehtsech scho gli ir Ischhaue :)

Chapeau Sniper!

Üses Mitglied Flöru "Sniper" Gnägi isch sim Spitzname grecht worde u knipst jede Gägner us, wo Ihm em Berner Kantonale im Sagmäu gegenüber gsteut isch worde!!!
Sniper, mir zieh dr Huet vo Dire tolle Leischtig u gratuliere Dir recht herzlech zu Dim bisher gröschte Erfoug im Schwizer Schwingsport! Glichzytig chöi mir feststeue, dass sech Di Wechsu zu üs glohnt het. Denn so e Leischtig cha nur öper bringe, wo immer gforderet wird, ou ufem Is ;)

D'Nomination fürs Kiuchberg Schwinget isch nur die logischi Foug für sone sensationelli Saison. Wer em Berner Kantonale 4 Eidgenosse ufe Rügge leit, ghört definitiv am Kiuchberg Schwinget zu de Gheimfavorite!! Mir drücke Dir Düme u si sicher, dass Du mitemne Topresultat die Saison wirsch abschliesse! Go for Muni Wilson!!

Gratulation Sniper!

Mir gratuliere üsem Vereinsmitglied Gnägi zu sim Sieg am Mittuländische Schwingfest in Bern!
Mit vier Siege u eire Niederlag isch er i Schlussgang cho, dert isch Ihm dr Matthias Glarner gägenüber gstange. Nachemne herte Kampf heter de churz vor Schluss mitemne innere Hacke dr Glarner chönne bezwinge u somit das Fest gwunne! Z'Wintertraining bi de Pinguins het Ihm doch guet da :) Witer so Gnägi!
www.floriangnaegi.ch


Christian Stucki (links) gratuliert Festsieger Florian Gnägi

Super Sniper!

D'Pinguins gratuliere Ihrem Vereinsmitglied Florian "Sniper" Gnägi, zu sim Sieg am Wislisau-Schwinget! Er het somit sini Vorbereitig für die kommendi Chranzfeschtsaison, optimau chönne abschliesse. Mir wünsche Ihm aui ganz viu Glück u Chraft für die kommendi Saison, mau luege obsechs Wintertraining glohnt het ;)
Wer dr "Sniper" in Action wot gseh, söusech doch siner Schwingfeschtdate im Kalender notiere. Er freut sich um jedi Ungerstützig.

Schwingfest 2014

03.05. Mittelländisches
           Schwingfest
BEA Bern
11.05. Emmentalisches
           Schwingfest
Schüpbach
25.05. Seeländisches
           Schwingfest
Studen
07.06. Oberaargauisches
           Schwingfest
Messen
14.06. Bözingenbergschwinget Bözingenberg
22.06. Schwarzsee Schwinget Schwarzsee FR
29.06. Nordostschweizerisches
           Schwingfest
Wigoltingen TG
19.07. Weissenstein Schwinget Weissenstein SO
27.07. Brünig Schwinget Brünig
10.08. Bernisch-Kantonales
           Schwingfest
St-Imier
07.09. Kilchberger Schwinget Kilchberg ZH

HV 2014

Die diesjährige HV findet wie folgt statt:

Wann: Freitag 23.Mai 2014 um 19:30 Uhr, Vorstandsmitglieder 19:00 Uhr
Wo: Restaurant Hirschen, 3256 Seewil

!!! Für alle Aktiv-Mitglieder obligatorisch !!!

Pingu-Koch-Events

Üse Event Organisator Hümmu het ufs nöiie Jahr hii einisch im Monet amne Mittwuch Abe d'Chuchi im Schueuhuus Seedorf für d'Pinguine reserviert. Wenn sich ou gnue amäude de wird er es super feins Menu zämä steue, das die Manne nang chli chöi unger d'Arme grife um so Deheim Fründin, Frou und anderi Gescht chönne z'bechoche :)
So werde d'Pinguine ou usserhaub vor Saison nang gseh u gmüetlech zäme e Abe verbringe. MERCI Hümmu!
Dir finget unger dr Rubrik Pingurezepte jewius z'Rezept wo d'Pinguine kochet hei zum säuber usprobiere.
Mir wünsche Öich viu Vergnüege drbii und de e Guetä!